【盘房来料】内地汽车股整定无运行
2020-06-13

【盘房来料】内地汽车股整定无运行放大图片

港股走势反覆,隔晚美股休市,但道指期货就脚软,恒指则低开高走,不过半日仍然有啲脚软,反映市场入市意欲极度疲弱。恒指低开80点后,开市一度跌128点,见半日低位25498点,其后拗腰再上,曾倒升109点,见过25736点半日高位。可惜喺缺乏买盘承接下,走势再度回软,半日恒指跌24点,报收25601点;国指则跌60点,报收10043点。

重磅蓝筹股个别发展,腾讯(00700)继续跑赢大市,半日升0.2%,报收331.8元,不过睇真啲,腾讯幅图又唔係好靓仔,家下股价仲畀条250日线压住,而335元似乎已成为阻力。舜宇(02382)重返红底股后,走势一枝独秀,今日再升任,成为半日表现最佳蓝筹。至于近日捲入政治事件嘅地铁(00066),连日受压后终于喺250日线见有些少支持,半日反弹1.6%。

陀地地产股被狂质几日后,今日终于有得抖吓气,不过睇真啲反弹力度弱过药煲。细魔刚刚帮手踩多脚,噚日有报告唱淡陀地地产股,指地产股虽然已累积跌近两成,但仍未反映所有不明朗因素,包括中美贸易战及香港政治事件,已严重拖累香港经济。细魔讲到明最熊嘅情况下,香港楼价可跌三成,而商舖租金可能亦要下跌30%,即係话未有货咪多手去捞,有货都好趁反弹逃生。

至于汽车股,阿Man讲咗N咁多次,千祈唔好畀一时三刻嘅反弹引诱到,再多国策支持都好,面对住贸易战过后开放市场嘅庞大竞争,又或者係贸易战期间嘅关税威胁,内地汽车製造商肯定唔会有运行。今日广汽(02238)更加喺分析员会议后被个别券商调低目标价,半日股价跌4.7%。其他内地汽车股跌幅由1.3%至超过3%。

而另一只今日弹半成嘅小米(01810),同样係唔可以被其诱惑,公司公布董事会获授权最多可斥资120亿元回购股份,听落好似好好听,千祈咪唔记得公司管理层仲有几多平到跌渣嘅股权喺手,加上公司耐唔耐就可以「慷慨」派送畀员工,基本上咁多平货周街游,小米短线反弹都好,长线唔会有运行。

麦狄文
(徐狄怡‧证监会持牌人)


上一篇:
下一篇: