【盘房来料】反弹市无用硬搵理由去解释
2020-06-13

【盘房来料】反弹市无用硬搵理由去解释放大图片

隔晚美股继续反弹,其实反弹咪反弹,点解硬係要搵个原因去解释,有时技术上超卖,出现反弹;又或者係空仓回补推动反弹亦可,为乜硬係要找个理由去解释,美国只係暂时放生华为90日咁大把,就讲到中美贸易关係有所缓和,更拉扯到呢几日美股反弹係憧憬多国将推出更多刺激经济措施,呢一点阿Man谂到头晕都未明点解。查实上周美股急挫係因为国债孳息倒挂,而呢两日美股持续反弹,係因为美国10年期债息回升至1.6厘水平,2年期债息则回落至1.55厘左右,反映债息曲线不再倒挂,咁先推断到经济衰退有所纾缓。反而呢两日除咗侵侵之外,再有美国官员将香港政治问题,綑绑到中美贸易谈判条件,反而令到谈判再现变数,阿Man都係建议小心驶得万年船,对于呢几日反弹切忌过度兴奋。

讲番恒指今日低开35点,跌幅一度扩大至142点,有口痕友归咎于林郑记招,其实都冇乜大关係,反正每次记招内容大同小异,唔需要过份解读。反而係A股倒升带动港股回升,一度令恒指最高见26347点,可惜乃未能升越噚日高位26356点,其后港股开始窄幅拉锯。中午恒指报收26294点,升2点;国指半日升50点,报10160点,恒指国指高下立见。

至于重磅蓝筹股,似乎腾讯(00700)有少少力不从心,上周派成绩表后,表现平平未见有大行加持,股价之前因为维稳资金买入,早已跑赢大市,家下叫收复咗335元,但要突破340元又谈何容易,可能又要靠北水入场撑腰。油价急涨带动中石油(00857)升2.1%,唔好怪阿Man长气都讲多次,油价呢味嘢,高追有伏,时运高当睇佢唔倒。其他重磅股个别发展,暂时未见其他重磅股有突出表现。

美国对华为禁令宽限期延长,手机股继续做好,当中阿Man较为睇高一线嘅舜宇(02382)重返红底股后,股价半日再升6.3%,留意有货要睇实,股价一转风向要即跳车。医药股呢个板块,阿Man一直不离不弃,尤其係龙头股更要另眼相看,除咗爱股中生製药(01177)再升之外,另一蓝筹石药(01093)派完中期成绩表,有大行唱好,半日股价劲升一成。不过呢期阿Man开始留意半新股翰森製药(03692),已获纳内恒指综合指数,市值过千亿元唔嘢少,加入蓝筹指日可待,作为长线投资谂得过。

上周阿Man喺《金融街密语》提到沽空机构有其存在价值,旨在打击一啲手法有问题上市公司,只要公司本身无做假,真金不怕洪炉火。阿Man过去多次推介嘅体品股龙头安踏(02020),充份体现行得正,企得正,谣言止于智者嘅精神,股价升破60元大关创新高。股价已顺利升抵首个60元目标,能否更上一层楼好难讲,总之都係睇位做人,股价企稳喺58元仍可持有。

麦狄文
(徐狄怡‧证监会持牌人)


上一篇:
下一篇: