主页 > 生物发展 >【盘房来料】传闻引入《紧急法》令市场变数大增 >

【盘房来料】传闻引入《紧急法》令市场变数大增
2020-06-13

【盘房来料】传闻引入《紧急法》令市场变数大增放大图片

隔晚美股经过两日急挫后,终于见反弹,由于三个主要指数都逼近重要支持位,作出技术反弹亦好合理。至于港股呢,唔知係咪噚日午后弹咗先,今早高开低走,表现麻麻。恒指高开59点,报26169点,但阿Man都讲过26200-26300阻力唔少,港股升唔得几多已迅速回落。二万六关得而复失。半日最多跌185点,见半日低位25924点。恒指中午报收25969点,跌幅略为收窄至140点;国指则跌42点,报收10178点。

其实噚日午后港股突然拗腰倒升,有缸湖传闻话係因为政府有意引用《紧急情况规例条例》(简称《紧急法》)为禁蒙面即时立法,香港有望解决当下乱局,所以港股要倒升贺一贺。若然呢个真係噚日港股反弹嘅原因,阿Man真係接受唔倒啰。9月初当政府宣布撤回《逃犯条例》修订,港股即急升千点,呢个还可以理解,话晒政府都叫做回应咗示威者嘅其中一个诉求。但噚日话通过禁蒙面法令个市回升,就真係讲唔过去。阿Man先唔讲禁蒙面有乜嘢负面影响先,但要透过引入《紧急法》嚟通过禁蒙面,咁就真係大件事。

大家不妨去政府官方网页,睇法清《紧急法》内容先,「在行政长官会同行政会议认为属紧急情况或危害公安的情况时,行政长官会同行政会议可订立任何他认为合乎公众利益的规例。」呢一点嘅意思係,阿特首加埋佢行政会议班马仔,几乎可以想点就点,以有关可以订立嘅规例就有就N咁多点,真係由A至N咁多点。其中一点睇到阿Man心惊惊嘅係,A点嘅【对刊物、文字、地图、图则、照片、通讯及通讯方法的检查、管制及压制】;以及F点嘅对【财产及其使用作出的拨配、管制、没收及处置】。点解呢,因为呢两点係相当切身嘅问题,A点一旦实施,阿Man可能连写篇稿都冇自由,或者用社交平台都冇自由;至于F点讲到财产喎,有边个唔惊,特首可以管埋你啲钱呀喂,大佬,係人都惊啦。

正正因为《紧急法》有咁嘅内容,引用起上嚟可以话係核弹级手段,尤其係钱银财产受到威胁,对自由资本市场係严重打击。当然刻下讲紧只係藉此通过禁蒙面法,但之后呢? 喺龙门任人摆嘅情况下,外资会唔会担心而加快撤离,甚至一走了知? 既然咁多不明朗同不稳定因素存在,点解个市会因为咁而回升呢……可能今日有人睇清楚之后,港股回番好正常,就唔唔大跌,都唔会因为咁而升呀。

至于落实引入《紧急法》后会点,阿Man冇水晶球答你唔倒,但纯睇技术走势的话,一日恒指仍守住25600至25700,而上面26200至26300阻力又唔破的话,咪行住Range先啰。只係今日又到周末前夕,加上外面传得沸腾引入《紧急法》而通过禁蒙面法最快呢两日实施,咁大个不明朗因素,係咪食住花生唔做嘢稳阵啲呢??

麦狄文
(徐狄怡‧证监会持牌人)


上一篇:
下一篇: