【盘房来料】侵侵见刘鹤 股市齐祝贺
2020-06-13

【盘房来料】侵侵见刘鹤 股市齐祝贺放大图片

隔晚美股做好,侵侵话今日会喺白宫跟国务院副总理刘鹤会面,虽然大家都知中美贸易谈判无可能轻易达成协议,但侵侵同刘鹤会面,有一定标誌性,至少市场相信可以喺某啲层面上有共识,贸易战得以缓和。

恒指裂口高开278点,成功收复10日线,其后虽然升幅一度受窄至268点,见过半日低位25976点。当大家以为港股无以为继之际,大市再度发力走高,一度升572点,见过半日高位26280点,更重返50日线(26184点)之上,睇个款升势有余未尽,企得番26200水平,有条件进一步向26500至26600挑战。中午恒指报收26271点,升563点;国指则升208点,报收10427点。

喺大市向好嘅同时,大家要留意番今晚侵侵同刘鹤会面嘅结果,若然都係好地地,就当然无问题,不过侵侵嗰种飘忽嘅性格,大家领教过,同金仔食食吓饭都可以反枱,所以绝不能掉以轻心。

蓝筹重磅股全面反弹,腾讯(00700)半日升2.3%,而市场憧憬油组为咗托住油价明年或减产,刺激油价做好,三桶油升2.9%至3.7%。只係油价升跌唔係单纯取决于产量,一旦全球经济陷入衰退,油价嘅升势都只係昙花一现。

本地银行股跟地产股都反弹,不过持续数月嘅社会运动,令社会动荡不安,经济已受打击,对于呢两个板块,阿Man仍有保留,呢转急升,可能係一个减磅好机会。内地传媒报道,石药(01093)专利独家药「恩必普」遭浙江监控使用,拖累股价急跌7%,其他医药股逆市下跌。医药股喺上半年跑赢大市后,因为政策关係最近走势如过山车,不过阿Man长线仍睇好龙头巨企,自问顶得住大上大落,医药股急挫或者係捞货时机。

半新股热炒,阿Man算係错过咗呢次新股热炒派对,不过炒半新股有个好处,就係无蟹货包袱,资金追捧够旺场,自然就吸引缸边友参与。而教育股中嘅高等教育股,阿Man一向认为受政策影响较少,因为之前所推出嘅政策,主要针对中小学教育,业务集中高等教育嘅股份,跟医药股一样,急跌靠稳就係上车机会。

又到周末前夕,难免受假日情怀所影响,见过今日大市急升,唔少缸边友都心急如焚,担心自己错过升浪。不过阿Man 提醒大家一句股市走势取决如资金流向,若然指数再升,但资金未能配合,短暂升势难以维持。目前恒指日线图叫做初步收复10、20及50日线,但至少要企稳上面三个交易日,先能够确定走势逆转,切勿开心得太早。

麦狄文
(徐狄怡‧证监会持牌人)


上一篇:
下一篇: