【盘房来料】企稳二万七仍有下跌裂口待回补
2020-06-13

【盘房来料】企稳二万七仍有下跌裂口待回补放大图片

港股近日表现确係有啲失常,持续一断时间都跑输畀A股,反而一个本应係利好A股嘅消息,A股无福消受,反而港股今日就无啦啦突围,真係估佢唔倒。恒指今早高开106点,升幅曾收窄至只有21点,见过6705点半日低位,其后横行至11点左右突围,最多曾升445点,见27128点半日高位,卒之完全回补8月5日所遗下嘅巨型下跌裂口,并成功收复50日线(27030点)。中午恒指报收27044点,升361点;国指升131点,半日报收10535点。

每当大市升势或跌势较明显时,唔少缸边友总会搵一个理由解释大市升跌,阿Man就一向认为唔需要刻意搵个理由,所谓嘅利好或利淡消息,本已存在,只係个市升咗或跌咗,就夹硬拎出嚟解释。好似中美关係露曙光咁,其实都讲咗好几日,不过隔晚侵侵突然炒咗鹰派国家安全顾问,就话係好消息,大佬呀,呢个消息係都先刺激美股狂升啦,既然美股对此消息反应不大,又点解会刺激港股突破呢。

传政府再作出让步

不过硬係要搵好消息,有单嘢可能大家无乜关注,就係有政党登报要求政府引用《收回土地条例》,立即兴建大量公屋改善住屋问题,更有传闻指今日收市后,政府再有消息公布,可能再作出让步,以尽快缓和,甚至终止目前嘅社会运动。好老实阿Man都係得个听字,呢场社会运动起因係逃犯条例修订,令香港人担心中港两地司法防火墙被毁,继而係香港嘅民主自由被逐步剥夺,但最近两个月已开始由修例焦点,转移到警队滥暴问题,要终止或暂停目前嘅状况,似乎打呢张居住问题嘅牌唔似会救到火。虽则民生问题係今次社会运动嘅远因,但触发点係近日一连串嘅暴力事件,近因唔解决去处理个远因,似乎讲唔过去。

不过陀地地产股之前又确係严重超卖,家下反弹亦显得合情合理,今日半场陀地地产股都录得不俗升幅,闲闲起升超过1%,升幅超过3%亦唔少,急跌后反弹好正常,唔需要将件事谂得太複杂。

反而之前跑赢嘅医药股见回吐,好明显係有资金换马,沽出已累积一定升幅嘅医药股,换入估值开始较为低残嘅地产股同银行股。预期大市升破27000点能企稳的话,或有机会继续向上回补8月2日所遗下嘅另一个巨型下跌裂口,即26950至27565点,同时有望挑战250日线(27373点)。当然能回补呢个裂口係好事,只係27000点楼上已积存唔少蟹货,喺过去呢个几月有否全部消化仍存疑问,阿Man都係嗰句,暂时唔会过份乐观,只视作跌市反弹处理,大市一日唔重返二万八点之上,未能完全摆脱弱势,若然阁下手上持仓较重的话,建议都係趁反弹再减减磅。

麦狄文
(徐狄怡‧证监会持牌人)


上一篇:
下一篇: