【盘房来料】周末前夕宜静观其变
2020-06-13

【盘房来料】周末前夕宜静观其变放大图片

中美两国副主管级别贸易代表电话会议,市场憧憬贸易战将向住好嘅方向发展,不过讲真阿Man都係平常心,所谓中美贸易战发展如何,好与坏只係市场解释股市升跌嘅理由,中美贸易战由去年爆发至今,除咗暴露咗两国之间矛盾,至目前为止未见双方关係有任何改善。

至于港股表现反覆,恒指高开9点,虽然开市后曾跌108点,见过25940点半日低位,其后拗腰回升,最多倒升165点,见过半日高位26214点。中午恒指报收26173点,升124点;国指半日升62点,报收10185点。

友邦(01299)公布业绩理想,业绩亮点係新业务价值增加20%,获大行唱好,股价半日升1.5%,已佔去恒指升幅43点。重磅蓝筹股除咗友邦表现较佳外,国寿(02628)半日升近4%,同业係中期新业务价值优于预期,成为蓝筹升幅冠军。国寿绩佳珠玉在前,太保(02601)喺业绩公布前升2.4%,创52周新高。其他内险股普遍上升。另外表现较好喺一对医药股孖宝,不得不提防医药股一直跑赢大市,升至现水平随时有机会出现回调,有货喺手要密切留意走势稍为转风向,要识得落车食糊。

至于燃气股及油服务今日亦有唔错表现,新奥能源(02688)中期多赚89%,股价半日升逾5%;燃气龙头中国燃气(00384)升1.9%,其他燃气股普遍录得1%以上升幅。陀地地产股个别发展,但普遍仍然偏软,其他亦只係早两日急跌后靠稳。而内房股继续随住人民币走软而表现疲弱,讲过内房股係受人民币升跌影响较大,人仔唔生性,内房股亦唔会有运行。

今日又到周末前夕,而G7峰会将于呢两日举行,法国总统已事先张扬,今次G7之后係唔会发表联合声明,係过去44年嚟首次。而侵侵作风一向出人意表,难以预测佢喺G7期间会有乜嘢动作,估计醒目缸边友都唔想博呢一铺,宁愿静观其变。恒指方面26300阻力仍大,守得住26000已算唔错,而25800点暂时有不俗支持。

麦狄文
(徐狄怡‧证监会持牌人)


上一篇:
下一篇: